Partnership between policewomen and civil society as a strategy to prevent violence against women

Paper presented at the International Islamic Police Women’s Conference, Kabul Afghanistan, October 21-25, 2007

Paper presented by Wazhma Frogh, Senior Gender Equality Advisor, Canadian Program Support Unit, Afghanistan.

د ښځینه پولیسو او مدني ټولنې تر منځ همکاري د ښځو په وړاندې د زورزیاتي څخه مخنیوی د یوه ستراتیژي په توګه
وړاندې شوې مقاله د مسلمانو ښځینه پولیسو نړیوال کنفرانس کی،  کابل، افغانستان، د میزان 29 تر عقرب 3، 1386
وړاندې کوونکی: وږمه فروغ، مشاور ارشد تساوی جندر، واحد پروگرام حمایت کانادا، افغانستان

د ښځینه پولیسو او مدني ټولنې تر منځ همکاري د ښځو په وړاندې د زورزیاتي څخه مخنیوی د یوه ستراتیژي په توګه
تر ټولو مخکې راځۍ چې د افغانستان وروسته له جګړې څخه او په یو شمیر سیمو کې د جګړې پر مهال د پولیسو اهمیت تحلیل او تجزیه وکړو، د افغاني ټولنې غړو په توګه زموږ څه هیلې دي، د منابعو، روشنفکرانو او مرستو په ګډون څه موجود دي؟ کله چې موږ د پولیسي چارو په باب غږیږو هدف مو نه یوازې د جنایت کنترول دی بلکې ټولنیز نظم، بشري حقونه، د قانون تنفیذ او عدالت ټول پکښې شامل دي.
افغانستان د یو پیاوړي او عادلانه اساسي قانون خاوند دی. موږ باید تحلیل کړو چې زموږ د قانون په تنفیذ کې کومې تشې موجودې دي چې موږ نشو کولای د اساسي قانون بر بنسټ د ښځو او نارینو تر منځ مساوات تامینکړو. آیا دا د ۶۰۰۰۰ تنه پولیسو دنده ده چې ۲۵ – ۳۰ ملیونو افغانانو ته مساوات او عدالت ورپه برخه کړي؟
کله چې موږ د مدني ټولنې په باب غږیږو، په حقیقت کې موږ د خلکو د ټولنې په باب غږیږو، او ټولنه د هر فرد (ښځې او نارینه) لپاره ګډ کور او سرپناه ده. کله چې د ټولنې افراد حقونه لري او غواړي چې د دولت له قوانینو او مقرراتو څخه ګټه پورته کړي، په عین حال کې هغوی د دې مکلفیت او مسئولیت هم لري چې په خپلو ټولنو کې د قانون په اغیزمنې پلي کولو کې ونډه واخلي، او کله چې د حکومت ملاتړ او لارښونې ته اړتیا ولري، حکومت ته مراجعه وکړي.
خو په یوه مدني ټولنه کې یو شمیر ډلې او سازمانونه موجود دي چې د خلکو د ژوند په ښه والي کې په مختلفو برخو کې په فعاله ټوګه بوخت دي، او زیار باسي چې د خلکو اندیښنې دولت او حکومت ته ورسوي، دغه سازمانونه د مدني ټولنې سازمانونو په نامه یادیږي. په تیرو ۲۰ کلونو کې دغه د مدني ټولنې سازمانونه د افغانستان په پرمختیايي او خیریه برخو کې مهم رول لوبولی دی، هم په ګاونډیو هیوادونو کې او هم د افغانستان د ننه کې. کله چې موږ د پرمختګ په اړه غږیږو، امنیت د پرمختګ لومړۍ ستون ده، او په مدني ټولنه کې د افرادو لپاره دوه ډول امنیت شته: ۱) عامه/ملي امنیت چې د ټولنې غړي اړتیا لري چې له هر ډول زور او تهدید څخه چې د هغوی ژوند او مال په وړاندې موجود وي، په امان اووسي.
خو ۲) ټولنیز امنیت او ټولنیزه ساتنه په افغانستان کې یوه پیاوړې اړتیا ده په ځانګړي توګه ښځو او ماشومانو لپاره ځکه ښځې او ماشومان د هر ډول تهدید چې یا په ملي کچه بې امنیتي وي او یا ټولنیز تحقیر یا تبعیض، په وړاندې زیان منونکي دي.
د مدني ټولنې سازمانونه یو مهم رول لري تر څو ښځې او ماشومان وکولای شي د محل او ټولنې په کچې باندې ټولنیزه ساتنه ولري نو لدې کبله ښځینه پولیس په دغه بهیر کې مهم دي.
یوازې د ښځینه پولیسو لرل په افغاني ټولنه کې د ښځو ټولې ستونزې نه هواروي، خو د مدني ټولنې او ښځینه پولیسو تر منځ باید پیاوړې همکاري موجوده وي ترڅو ښځینه پولیس د اړتیا وړ معلومات او ملاتړ د محل خلکو څخه د هغوی د مرستې لپاره لاسته راوړي. دغه همکاري باید د مدني ټولنې سازمانونو لخوا مطبوعاتي اعلامیو له خپرولو او د زیات شمیر ښځینه پولیسو د ګمارلو څخه باید ډیر زیات وي، خو اړیکه باید پیاوړې وي او منظمې اړیکې د دواړو تر منځ باید موجودې وي.
د مدني ټولنې سازمانونو او ښځینه پولیسو تر منځ باور او ښې اړیکې په دغه بهیر کې د بریالیتوب لپاره کلیدي بلل کیږي. د افغانستان قومي ټولنه احساس نکوي چې پولیسو ته مراجعه وکړي په تیره بیا د ښځو په وړاندې د زورزیاتي او د ښځو په اړوند نورو موضوعاتو کې. افغانان زیار باسي چې دغه ډول موضوعات د کورنۍ او محل په کچه پرته لدې چې پولیسو ته مراجعه وکړي، هوار کړي. لدې چې د ښځو ټولنیز وضعیت نارینو سره برابر ندی، او په ټولنیز ژوندانه کې د ښځو د ګډون په وړاندې د کلتوري خنډونو د موجودیت له امله خلکو ته مشکله ده چې ښځینه پولیسو باندې باور وکړي او هغوی سره خپلې ستونزې شریکې کړي، دا خو لا پریږده چې دا په ندرت پیښیږي چې هغوی خپلې ښځو ته اجازه ورکړي چې له پولیسی ځواک سره یو ځای شي. لدې کبله دغه سخت او بخراني حالت د مدني ټولنې سازمانونو ملاتړ ته اړتیا لري تر څو نه یوازې د خلکو او ښځینه پولیسو تر منځ اړیکې پیاوړې کړي، بلکې د مطبوعاتو له لارې د ښځینه پولیسو مثبت تصویر خلکو ته وړاندې کړي.
په پولیسو او ښځینه پولیسو باندې انتقاد او ګوت نیونه د مدني ټولنې سازمانونو سره مرسته نکوي چې هغوی وهڅوي چې له محلي خلکو سره مرسته وکړي بلکې دا مهمه ده چې پدې پوه شو چې پولیس هم له دغو خلکو څخه جوړ شوی دي چې هغوی هم ورته ستونزې لري. دا د مدني ټولنې سازمانونو ته مهمه ده چې د سوله جوړونې د ناظرینو په توګه باید د ښځینه پولیسو ستونزې روښانه کړي او محلاتو ته په دغه اړه خبر ورکړي په تیره بیا د ښځو د دې رولونو په باب: ګټور، تولیدي او محلي ملاتړ. څرنګه چې د مدني ټولنې سازمانونه نړیوالو منابعو او ملاتړ څخه برخمنې دي او بشري منابع هم لري، نو باید ښځینه پولیسو سره مرسته وکړي او هغوی ته د بشري حقونو، جندر حساسیتونو او د ښځو او نجونو د ټولنیزو ساتنو اړتیاؤ په برخو کې زده کړې ورکړي. مونږ باید پولیسو سره کارو کړو تر څو د سزا تفکر د خیر له تفکر سره بدل کړو او د محلي پولیسو چارو له لارې ټولنیز نظم او ساتنې په لور دغه بهیر ته بدلون ورکړو.
یوازې ښځو سره د کار کولو له لارې د ښځو په وړاندې زورزیاتي له منځه نه ځی بلکې زیات شوی دی. له دې کبله دا د مدني ټولنې سازمانونو ته مهمه ده چې له ټولو پولیسو او خلکو سره کار وکړي تر څو د ښځو په وړاندې د زورزیاتي اصلي ریښې وپیژندل شي او له خلکو سره په ګډه د هغوی د هواري لپاره د حل دوامدارې لارې پیدا شي.